''ကျွန်မနဲ့
မဌေးပိုကို မန္တလေးမှာ အိမ်အကူ အလုပ် လုပ်ရမယ် ဆိုပြီး ခေါ်ဆောင် သွားတာပါ။
၂ဝဝ၇ ခုနှစ် သင်္ကြန် မကျခင် အချိန်မှာပါ''ဟု ခြောက်နှစ်ကြာ ကွဲကွာနေပြီး
ဇာတိ ရပ်ရွာသို့ ကံကောင်းခြင်းများစွာဖြင့် ပြန်ရောက်လာသော မခင်စိုး က
ပြော သည်။ မခင်စိုးနှင့် မဌေးပိုတို့အား မန္တလေး-မူဆယ်-ရွှေလီမှ
တစ်ဆင့် တစ်ဖက်နိုင်ငံ အတွင်းသို့ ခေါ်ဆောင်လျက် အသက်အရွယ် ကြီးမားသော
အဘိုးအို၏ မယားအဖြစ် ရောင်း စားခြင်းခံခဲ့ ရသည်ဟု မခင်စိုးက
ဆက်လက်ပြောပြသည်။ တစ်ဖက်နိုင်ငံအတွင်းရောက်၍ မဌေးပိုနှင့် မခင်စိုးအား လူချင်းခွဲထုတ်ရန် လုပ်ဆောင်လာသည်။ မခင်စိုး အား ဈေးသွားဝယ်ရန် အကြောင်းပြ၍ လူချင်းခွဲထုတ်သည်ကို အချိန်ကြာလာသည်နှင့်အမျှ ရိပ်မိ၍ တည်းခို ခန်းသို့ အမြန်ဆုံး ပြန်လာခဲ့သည်။
တည်းခိုခန်း၌ ကျန်ခဲ့သူ မဌေးပိုမှာ ပျောက်ဆုံးသွားခဲ့ရာ ယနေ့တိုင် သတင်းအစအန မရရှိတော့ကြောင်း သိရသည်။ ကျန်ခဲ့သူ မခင်စိုးအား တစ်ဖက်နိုင်ငံအတွင်း အဘိုးအိုတစ်ဦး၏မယားအဖြစ် ရောင်းစားခြင်း ခံခဲ့ရသည်။ မခင်စိုးသည် အချိန်မနှောင်းခင် သတ္တိရှိရှိဖြင့် ထွက်ပြေးခဲ့သည်။
စွန့်စားထွက်ပြေးရာတွင် ကူညီစောင့်ရှောက်သူများနှင့် တွေ့ဆုံခဲ့၍ မခင်စိုး၏ဘဝသည် အကျည်းတန် ရုပ်ဆိုးခြင်းဘေးမှ ကင်းလွတ်ခဲ့ရသည်။ လူသားချင်းစာနာစွာကူညီစောင့်ရှောက်သူများနှင့်တွေ့ဆုံ၍ ဝမ်းရေး အတွက် အလုပ်လုပ်ကိုင်ရင်း ဝမ်ရှီတုံအမည်ရှိ အမျိုးသားနှင့် အိမ်ထောင်ကျခဲ့သည်။
ယခုအခါ ဝမ်ယုချီအမည်ရှိ ငါးနှစ်သားအရွယ် သားကလေးတစ်ယောက်ရရှိနေပြီဖြစ်ကြောင်း မခင်စိုး က ပြောပြသည်။ မခင်စိုးသည် ဇာတိရပ်ရွာနှင့် ခြောက်နှစ်တာကာလအထိ ခွဲခွာရ၍ အမျိုး သားနှင့် ယောက္ခမဖြစ်သူအား ခွင့်ပန်ကာ နှမ်းဆီကန်ရွာနေ မွေးမိခင်အိုကြီးကို ခေါ်ယူရန် ၂ဝ၁၃ ခုနှစ် မတ်လဆန်းက ရွာသို့ ပြန်ရောက်လာခဲ့သည်။
''အဖေကမရှိတော့ပါဘူး။ ကျန်ခဲ့တဲ့အမေ့ကို ခေါ်ယူဖို့ ပြန်လာတာပါ၊ သူတို့ကလည်း ခွင့်ပြုပါတယ်။ လမ်းမှာ အခက်အခဲ မရှိအောင် မြန်မာစကားတတ်တဲ့သူတို့ ဆွေမျိုးအမျိုးသမီးအဖော်နဲ့ ပြန်ရောက်လာတာပါ။ ကျွန်မ က ပြန်သွားမှာပါ။ သားလေးကလည်း ဟိုမှာကျန်ခဲ့ပါတယ်။ သည်ရောက်တော့ ကျွန်မနဲ့အတူ ရောင်းစားခံခဲ့ ရတဲ့ မဌေးပို အကြောင်း ကြားရတော့ အလွန်ပဲစိတ်မကောင်း ဖြစ်မိပါတယ်''ဟု မခင်စိုးက ပြောသည်။
မဌေးပို၏ ဆွေမျိုးသားချင်း မိဘများသည် မဌေးပို အရေးကိစ္စအား ဖြေရှင်းပေးရန် သက်ဆိုင်ရာသို့ တိုင်ကြား ထားပြီ ဖြစ်ကြောင်း ဒေသခံတစ်ဦးက ပြောသည်။
မသိ နားမလည်သော ကျေးလက်ဌာနေ မိန်းမပျိုလေးများအား တစ်ဖက်နိုင်ငံသို့ လှည့်စား ကာ ရောင်းစားနေသော လုပ်ရပ်များကို နိုင်ငံတော်မှ ထိရောက်စွာ အရေးယူလျက် ဒုက္ခရောက်နေသော မိန်းမပျိုလေးများကို အမြန်ဆုံးရှာဖွေဖော်ထုတ် ကူညီပေးသင့်ကြောင်း ဒေသခံပြည်သူများက လိုလားတောင့် တ နေကြောင်း သိရသည်။
နေဦးမောင် (ပခုက္ကူ)
မြဝတီ
No comments:
Post a Comment