ပအိုဝ်း အမျိုးသား လွတ်မြောက်ရေး အဖွဲ့ချုပ် (PNLO) သည် စက်တင်ဘာလ (၇) ရက်နေ့ အမှီ တောင်ကြီး၌ ဆက်ဆံရေး ဖွင့်လှစ်တော့မည်ဖြစ်ကြောင်း PNLO အဖွဲ့၏ ဥက္ကဋ္ဌ ဖြစ်သူ ခွန်ဥက္ကာမှ ပြောသည်။
“ရုံးဖွင့် နိုင်ဖို့အတွက် တာဝန် ပေးထားတဲ့ လူတွေကတော့ ပြင်ဆင်မှုတွေ အသည်းအသန်
လုပ်နေတယ်လို့ ပြောနေတယ်၊ ကျွှန်တော့် ဆီကိုတော့ နောက်ဆုံးအခြေအနေ အတွက် တရားဝင် သတင်း ပေးပို့ လာတာတော့ မရှိသေးဘူး၊ ကျွှန်တော် ကတော့ စက်တင်ဘာ (၇) ရက်နေ့ မတိုင်မှီ ဖွင့်နိုင်အောင် လုပ်ပါလို့ ပြောထားတယ်လေ” ဟု ခွန်ဥက္ကာမှ ပြောပါသည်။
ဆက်ဆံရေးရုံး တာဝန်ခံ အဖြစ် ဗိုလ်မှူး ခွန်ဇွဲထိုအား တာဝန်ပေးအပ်ရန် လျာထားသည်ဟု ဆိုပါသည်။
ပြည်နယ် အဆင့် အပစ်အခတ် ရပ်စဲရေး သဘော တူညီချက်အရ PNLO အဖွဲ့၏ ဆက်ဆံရေး ရုံးများကို ရှမ်းပြည်နယ် တောင်ကြီး၊ မောက်မယ်နှင့် ဆီဆိုင်မြို့များတွင် ဖွင့်လှစ်ရန် သဘောတူ ခဲ့ကြပြီး ယခု ပထမဦးဆုံး အနေနှင့် တောင်ကြီး ဆက်ဆံရေး ရုံးကို ဖွင့်လှစ်နိုင်ရန် ကြိုးပမ်း နေခြင်း ဖြစ်ပါသည်။
ထို့ပြင် မွန်ပြည်နယ်ရှိ သထုံမြို့၌ ဆက်ဆံရေး ဖွင့်လှစ်နိုင်ရန် PNLO မှ တင်ပြ တောင်းဆို ထားသော်လည်း ဤကိစ္စကို လာမည့် ပြည်ထောင်စု အဆင့် ဆွေးနွေးပွဲတွင် ဆွေးနွေးကြမည် ဖြစ်ပါသည်။
ပြည်ထောင်စု အဆင့်နှင့် ဆက်လက် ဆွေးနွေး နိုင်ရန်အတွက် အပစ်အခတ် ရပ်စဲမှု ခိုင်မာရေး၊ နှစ်ဖက် တပ်ဖွဲ့ဝင်များ လိုက်နာ ရမည့် စည်းကမ်း ချက်များ သတ်မှတ် နိုင်ရေး၊ ဆက်ဆံရေးရုံး လုပ်ငန်း လည်ပတ် နိုင်ရန်အတွက် ကူညီ ပံ့ပိုးရေး၊ PNLO/PNLA တပ်ဖွဲ့ဝင် များ၏ တပ်တည် နေရာ ညှိနှိုင်းရေး၊ မူးယစ်ဆေးဝါး တိုက်ဖျက်ရေးတွင် ပူးပေါင်း ဆောင်ရွက်ရေး တို့ကို အကြို ညှိနှိုင်း၍ ဆွေးနွေးရန် နှစ်ဖက် သဘောတူ ခဲ့ကြပြီး ဖြစ်ပါသည်။
ပအိုဝ်တွေ့ဆုံဆွေးနွေးရေးခေါင်းဆောင် ခွန်မြင့်ထွန်းအား ဦးအောင်မင်းကြိုဆိုပုံ“ကျွှန်တော်တို့ တပ်တွေ ရှိနေတဲ့ နေရာ လက်ရှိ နေနေတဲ့ နေရာကိုပဲ လောလောဆယ် သူတို့ ဘက်က ယာယီ အသိအ မှတ် ပြုထားတယ်၊ သို့သော် လည်းပဲ နီးရာ ပြည်သူ့စစ် တပ်တွေ၊ ရှေ့တန်း တပ်တွေနဲ့ ညှိရ အုံးမှာပေါ့၊ ကျွှန်တော်တို့ ဆီမှာက အစိုးရ တပ်တွေ ကျွှံဝင်နေတာ၊ ကျွှန်တော်တို့ နေရာထဲကို တပ်စွဲ ထားတာတွေ သိပ်မရှိဘူး၊ ကျွှန်တော်တို့ တပ်တွေ လက်ရှိ ရှိနေတဲ့ နေရာကို သူတို့ အသိအမှတ် ပြုပေးရင် လုံလောက် ပါပြီ” ဟု PNLO အဖွဲ့၏ ဥက္ကဋ္ဌ ဖြစ်သူ ခွန်ဥက္ကာမှ ပြောပါသည်။
အစိုးရနှင့် အပစ် အခတ် ရပ်စဲရေး သဘောတူ လက်မှတ် ရေးထိုးပြီး နောက် လွန်ခဲ့သည့် စက်တင်ဘာလ (၁) ရက်နေ့တွင် PNLO အဖွဲ့မှ မဲဆောက်မြို့၌ ပအိုဝ်း ပြည်သူလူထု နှင့် တွေ့ဆုံ ရှင်းလင်းပွဲ တစ်ခု ပြုလုပ်ခဲ့ပြီး ပြည်သူ များ၏ တင်ပြချက် များကို ရယူ ခဲ့ကြောင်း ခွန်ဥက္ကာမှ ပြောသည်။
အဆိုပါ လူထု တွေ့ဆုံ ရှင်းလင်းပွဲသို့ ဒုက္ခသည် စခန်းမှ ပအိုဝ့် ပြည်သူ လူထုများ၊ ဗန်ကောက်၊ ချင်းမိုင်၊ မဲဟောင်ဆောင်မှ ပအိုဝ်း ပြည်သူများက ကိုယ်စားလှယ်များ စေလွှတ်၍ တက်ရောက် ခဲ့ကြသည်ဟု သိရှိရပါသည်။
“သူတို့တွေ အကြံပေး ကြတာ တွေလည်း ကောင်းပါတယ်၊ တစ်ဖွဲ့နဲ့ တစ်ဖွဲ့တော့ အမြင် မတူကြဘူး၊ ရေစီးကြောင်းထဲ ရောက်နေပြီ မလုပ်လို့ ကလည်း မဖြစ်၊ လုပ်မယ် ဆိုလည်း ဘယ်လိုလုပ်ဖို့ ဆိုတာတွေ၊ ဘယ်လို သတိရထားရမလဲ ဆိုတာတွေ အဲဒီ အခြေအနေ တွေအပေါ် ဆွေးနွေး အကြံပေး ကြပါတယ်၊ အပစ်အခတ် ရပ်စဲရေး လုပ်တာကိုတော့ မှားတယ်လို့ အပစ်တင် တာတော့ မရှိပါဘူး” ဟု ခွန်ဥက္ကာမှ ပြောသည်။
ပြည်တွင်းရှိ ပအိုဝ်း ပြည်သူ လူထုများနှင့် တွေ့ဆုံ ရှင်းလင်းပွဲ ကိုမူ တောင်ကြီး ဆက်ဆံရေးရုံး ဖွင့်လှစ်ပြီးနောက် ကျယ်ကျယ် ပြန့်ပြန့် လုပ်ဆောင် သွားရန် ရှိသည် ဟုလည်း ဆိုပါသည်။
PNLO အဖွဲ့သည် ၂၀၁၂ ခုနှစ် သြဂုတ်လ (၂၅) ရက်နေ့တွင် ရှမ်းပြည်နယ် အစိုးရနှင့် ပြည်နယ်အဆင့် ပထမဆုံးအကြိမ် အပစ်အခတ် ရပ်စဲ ရေး သဘောတူလက်မှတ် ရေးထိုး ခဲ့ပါသည်။ အစိုးရတို့၏ ပြည်ထောင်စု အဆင့် ဆွေးနွေးပွဲကို အောက်တိုဘာလ တတိယ ပတ်ခန့်တွင် တွေ့ဆုံရန် စီစဉ် ထားပြီး ရက်ချိန်း အတိအကျကို နှစ်ဖက် ညှိနှိုင်း အတည်ပြု နိုင်ခြင်း မရှိသေးဟု ခွန်ဥက္ကာမှ ပြောပါသည်။
From:ShweHinTa
No comments:
Post a Comment